紙包雞、紙火鍋就聽得多，估唔到台灣一間造紙廠最近真係做出「食得嘅紙」，還和餐廳合作研發紙麵條、紙飯團、火鍋湯底紙、乾煎肉紙等紙料理，第時歎紙火鍋唔單止可以食埋個鍋，閒時練書法食埋幅字畫落肚，唔知會否變到滿肚墨水呢？
紙向來是用樹木纖維製造，台灣廣興紙寮（網址：http://www.taiwanpaper.com.tw）便想到以蘿蔔、韮菜、芋頭、橙等瓜果蔬菜的纖維，製作成不同口味的可食用紙。吃時還可煮出多種變化，只要將紙放在鑊煎香，用醬油寫大字便可做成脆紙，又或者放在火鍋裏變成湯底紙，既天然又環保，預計農曆新年後便推出巿面，到時去台灣可能又多一樣手信。
發明可食用造紙術的老闆計劃出100種可吃的紙，還融入傳統紙麵條等料理內，但小記認為齋食未免浪費了老闆的心思，所以就諗出幾種食紙法，例如將食用紙印成宣傳單張派發，到時有得睇又有得食，仲肯定人人爭住要。又或者做成手工紙，教小朋友摺紙鶴做勞作後，玩完再食埋落肚，絕對天然高纖有營養，唔怕小朋友唔食蔬菜。其他惡搞食法包活：
過往電影動漫都出現過不少食紙橋段，只不過唔係食紙毀滅證據，就係被視作怪人看待，早年台灣就有單新聞話議員食紙抗議提案，激過香港多多聲。但如果知道紙有咁多口味又咁好食，相信再唔會有人認為食紙係受罪。
1. 電影
李小龍在《精武門》入面，踢完館撕下「東亞病夫」張紙，隨手塞入去東洋人個口，呢幕係經典中的經典。
2. 動漫
動漫小說一樣有食紙情節，好似衞斯理《屍變》主角吃下父親遺留的記事簿變成外星人；野村美月小說改篇的《文學少女》則認為食不同文章有不同味道。
3. 設計
冰島產品設計師Hafsteinn Juliusson更早之前已構思過一種叫名Slim Chips「食得嘅紙」，可以過口癮之餘食完又唔怕肥。
別以為紙做食物係天方夜譚，細細個就聽過話打仗時要食樹皮充飢，俗語都有話「窮到要食紙皮」。發展至今有多款食物真係以紙創作，一樣咁好食。
食紙新聞播出以後，不少人在網上留言討論，有人叫大家諗想食乜味的紙，又有人怕乾巴巴唔好食，不過點都好，呢個概念既新鮮又環保，至少已做成巿民話題，最搞笑有人話「使唔使燒咗先食到」，真係大吉利是咯。
撰文：鍾鎮科
部分攝影：方偉堅
模特兒：Lilian（Joint Hill）
留言列表