米高（林澄光）最愛食牛，而且達致瘋狂程度，但今次來到灣仔新開業的餐廳試食，就要轉轉Channel，因這是間「豬」賣店，內裏有一系列豬肉、豬雜美食，憑着定位獨特，菜式刁鑽，短短時日已受食客注目。
「信得過」店主Peter說起開店構思：「坊間有食牛、雞的專門店，偏偏就沒有豬的，所以就決定開一間。」既然打正旗號做「豬」賣店，所以翻開餐牌會見到杏汁白肺湯、黃沙乳豬膶、豬腰仔、豬生腸、豬心等，豬雜可謂花樣百出，而就算大家不食內臟，亦可選火朣老雞濃湯、鮮元貝雲吞、豬仔蝴蝶腩、花膠鮮肉水餃等，照顧不同食客需要。
能夠搜羅「豬」多部位，Peter解釋：「我每日都從本地購買新鮮乳豬，揀乳豬是因為豬隻還未受污染，可以放心食用。」店子每日用上約15個豬肺、30斤黃沙膶：「黃沙膶是指未受污染、顏色呈淺黃色的豬肝，入口特別爽甜。至於豬生腸更加矜貴，每一百隻乳豬只有約十隻，還要未生過的雌性小豬才有。」他補充道。店方強調不用味精，所有豬雜除徹底清洗外，更只會白灼，令食材原味、鮮味得以保存，不過，嘗辣的朋友可選麻辣醬汁，食得盡興。
菜一到米高就埋首試食：「其實我都鍾意食豬肉的，仲會不時食豬雜。」他更憶述各地的豬美食，例如吉隆坡的世界第一叉燒、馬來西亞的肉骨茶、上海的圓蹄、日本的炸豬扒等，在香港則鍾情盅頭排骨飯、豬骨煲以及打邊爐的豬雜。這少年食神最愛食豬腰、豬膶：「喜歡那種爽脆口感，記得連埋薑葱、辣椒豉油一齊食，特別惹味。豬雜最緊要新鮮，烹調時間亦要拿捏得準，否則效果差天共地。」
經過一輪衝鋒陷陣，米高已試出心水選擇：「鮮元貝雲吞好有驚喜，味道細緻，豬肉同元貝味道幾夾，而且個金魚尾造型有心思。另外，我鍾意黃沙乳豬膶，個質感爽又滑，如果豬味濃啲會更突出。」少年食神平日金句多多，曾講過「食嘢是享受，而不是忍受」、「如果食了一樣致肥的食物，我會食一樣抵肥的食物，不要浪費Quota」。即使一次過食了如此多豬肉，他仍然笑笑口說：「哈，我會食番多啲蔬菜，均衡飲食，之後就再食下一餐啦。」
繼續飲飲食食，又不定期到電台開咪講食。月底會為外國電視台主持飲食節目，之後更推出講泰國飲食的書，將多年搵食心得同大家分享。
留言列表